Беларуская чыгунка за пяць месяцаў года перавезла больш за 24 мільёны пасажыраў

Па папярэдніх дадзеных, у студзені-маі 2023 года Беларуская чыгунка перавезла ва ўсіх відах зносін больш за 24 млн пасажыраў, паведамляе прэс-цэнтр магістралі.

Унутры краіны найбольш папулярнымі маршрутамі ў пасажыраў былі Мінск — Брэст, Мінск — Гомель і Мінск — Віцебск.

У міжнародных зносінах найбольшым попытам карысталіся цягнікі, якія курсіравалі паміж Мінскам і Масквой, Мінскам і Санкт-Пецярбургам.

Усяго з пачатку года маршрутамі міжнародных зносін перавезена больш за адзін мільён пасажыраў, што амаль на 22 працэнты больш, чым за аналагічны леташні перыяд.

Цяпер паміж Рэспублікай Беларусь і Расійскай Федэрацыяй арганізаваны рэгулярныя пасажырскія зносіны ў напрамку Масквы, Санкт-Пецярбурга, Адлера, Калінінграда, Мурманска, Архангельска, Анапы і Самары (з 14 чэрвеня). Штотыдзень паміж дзвюма дзяржавамі курсіруюць каля 150 цягнікоў.

У маі 2023 года паслугамі Беларускай чыгункі скарысталіся каля шасці мільёнаў пасажыраў.