Як арганізаваны перадсвяточны гандаль у Беларусі

Новы год і Каляды набліжаюцца, і цяпер самы час для самых разнастайных пакупак. З улікам высокага попыту важны значныя запасы тавараў і шырокі асартымент. У Беларусі падрыхтаваліся ўжо да правядзення ёлачных базараў, кірмашоў, распрадаж. Да святочных мерапрыемстваў гатовы і аб'екты грамадскага харчавання. Пра асартымент і цэны расказала сёння журналістам начальнік упраўлення арганізацыі гандлю і грамадскага харчавання Міністэрства антыманапольнага рэгулявання і гандлю Наталля Мельнікава.

Паводле слоў Наталлі Мельнікавай, у рэгіёнах зацверджаны планы арганізацыйных мерапрыемстваў па гандлёвым і бытавым абслугоўванні насельніцтва. "Забяспечваецца пастаянная наяўнасць шырокага асартыменту тавараў у арганізацыях гандлю. Завершана работа па афармленні вітрын аб'ектаў гандлю, аб'ектаў грамадскага харчавання, гандлёвых, абедзенных залаў, прылеглых тэрыторый і фасадаў будынкаў з выкарыстаннем святочных інсталяцый", - сказала яна.

У перадсвяточныя і святочныя дні па ўсёй тэрыторыі краіны па ўзгадненні з мясцовымі выканаўчымі і распарадчымі органамі прадаўжаюцца рэжымы работы гандлёвых аб'ектаў і аб'ектаў грамадскага харчавання. У гэтым годзе запланавана прадаўжэнне работы 350 аб'ектаў гандлю і 240 - грамадскага харчавання.

У аб'ектах грамадскага харчавання арганізаваны прыём папярэдніх заказаў ад насельніцтва на выраб мучных, кандытарскіх і іншых кулінарных вырабаў, паўфабрыкатаў. У перадсвяточныя дні прымаюцца заказы на абслугоўванне навагодніх і калядных свят, агеньчыкаў, карпаратываў. Арыенціровачны кошт пераднавагодніх мерапрыемстваў - ад Br100 да Br200. "У навагоднюю ноч гэта будзе крыху даражэй - каля Br250", - удакладніла Наталля Мельнікава.

Па традыцыі штогод праводзяцца кірмашы. Ва ўсіх рэгіёнах запланавана больш за 600 кірмашоў, яны пачалі працаваць з 8 снежня. "Гэта больш, чым у мінулым годзе, прыкладна на 4 працэнты", - дапоўніла прадстаўнік МАРГ. Пачалі ўжо працаваць ёлачныя кірмашы.

Запланаваны мерапрыемствы, накіраваныя на стымуляванне спажывецкага попыту. "У перадсвяточныя і святочныя дні ў планах правесці больш як 12 тыс. такіх мерапрыемстваў, у тым ліку звыш 9 тыс. распрадаж, больш як 1 тыс. рэкламных акцый, а таксама дэгустацыі і рэкламныя гульні. Усе буйныя гандлёвыя цэнтры краіны праводзяць ужо гэтыя акцыйныя мерапрыемствы і будуць іх прадаўжаць да сярэдзіны студзеня 2024 года", - адзначыла Наталля Мельнікава.

Святочны асартымент разнастайны і будзе налічваць каля 22 тыс. найменняў навагодняй атрыбутыкі. Акрамя таго, як і звычайна напярэдадні Новага года, прадпрыемствы айчыннай кандытарскай галіны падрыхтавалі навагоднія падарункі. У 2023 годзе запланавана атрымаць 2 млн 400 тыс. штук такіх падарункаў. Асартымент будзе налічваць каля 100 найменняў ад 300 г да 3 кг. Акрамя разнастайных кардонных упаковак, у гэтым годзе будзе выкарыстана ўпакоўка з фарматам анімацыі 3D. Гэта дзецям будзе вельмі цікава. Кошт падарункаў - ад Br8 да Br80 у залежнасці ад вагі і камплектацыі", - расказала прадстаўнік МАРГ.

У шырокім асартыменце ў гандлі таксама прадстаўлены пеністае віно і шампанскае. Гэта больш за 40 найменняў. Кошт адной бутэлькі - ад Br8 да Br20.

У гандлёвых аб'ектах арганізаваны спецыяльныя аддзелы па продажы ёлачных упрыгажэнняў. Пакупніку ў гэтым годзе прадстаўлена каля 2 тыс. найменняў розных ёлачных упрыгажэнняў, сувеніраў у рознай упакоўцы, больш за 100 найменняў штучных елак і соснаў. Настольная штучная елка будзе каштаваць ад Br8 і вышэй. Таксама прапануецца больш за 100 найменняў карнавальных касцюмаў, у тым ліку Дзеда Мароза, Снягурачкі.

МАРГ пастаянна кантралюе, каб у магазінах быў шырокі асартымент тавараў. З 1 снежня праведзена ўжо больш за 150 маніторынгаў. А з 1 студзеня - звыш 4 тыс. Калі ёсць нейкія парушэнні, міністэрства выдае рэкамендацыі суб'екту гандлю аб іх устараненні.