Паводле аператыўнай інфармацыі абкама прафсаюза работнікаў АПК, на 6 жніўня шэсцьдзесят экіпажаў камбайнаў намалацілі звыш 1 тыс. т збожжа (з іх 1 – сямейны, 5 моладзевых), 67 вадзіцеляў (у тым ліку 4 маладыя) перавезлі больш за 1 тыс. т збожжа, шэсць вадзіцеляў (1 малады) – звыш 2 тыс. т. Ва ўборцы збожжавых і зернебабовых культур і рапсу лідавалі:

Сельгаспрадпрыемствы (па ўраджайнасці):

Збожжа:

СПК «Ларынаўка» Аршанскага раёна – убрана 781 га (53,1 %), ураджайнасць 70,6 ц/га. ААТ «Хотылы-Агра» Пастаўскага раёна – 524 га (29%), 64,8 ц/га.

Рапс:

 ААТ «Праўда-С» Дубровенскага раёна – 240 га (100 %), 50,8 ц/га. СУП «Зубрэвічы-Агра» Аршанскага раёна – 300 га (100 %), 50,7 ц/га.

Камбайнеры (збожжа + рапс):

Павел Грунтоў з ААТ «Віцебская бройлерная птушкафабрыка» на камбайне GS-12А1 убраў 357 га, намалаціў 1879 тон. Дзяніс Пшанічны з ААТ «Маяк Высокае» Аршанскага раёна (GS-1218, 437 га, 1761 т). Андрэй Новіцкі і Арцём Горэлы з РПУП «Вусце» НАН Беларусі» Аршанскага раёна (GS-1218, 448 га, 1759 т). Андрэй Капашылаў з СПК «Ларынаўка» Аршанскага раёна (New Holland, 232 га, 1640 т). Аляксандр Зябка з філіяла «Альшанка-Агра» ЗАТ «Віцебскаграпрадукт» Чашніцкага раёна (New Holland, 309 га, 1613 т).

Маладыя камбайнеры:

Станіслаў Чарвінскі і Уладзіслаў Кусцікаў з ААТ «Якубава-Агра» Дубровенскага раёна (GS-1218, 493 га, 1627 т). Уладзіслаў Лапцінскі з КУСП «Мяжава-Агра» Аршанскага раёна (New Holland, 466 га, 1516 т).

Вадзіцелі на адвозцы збожжа і рапсу:

Васіль Мірановіч з РПУП «Вусце» НАН Беларусі» Аршанскага раёна на аўтамабілі МАЗ-551605 перавёз 2923 т збожжа. Аляксандр Бацян з ААТ «Якубава-Агра» Дубровенскага раёна (МАЗ-5516А5, 2361 т).

Маладыя вадзіцелі:

Андрэй Бугаеў з ААТ «Якубава-Агра» Дубровенскага раёна (МАЗ-555142, 2580 т). Арцём Ігнацьеў з ААТ «Віцебская бройлерная птушкафабрыка» (МАЗ-650128-584-000, 1801 т).

Аператары сушыльных агрэгатаў:

Андрэй Карэнькаў, Аляксандр Голазубаў, Аляксей Шчарбакоў, Максім Царыкаў з ААТ «Агракамбінат «Юбілейны» Аршанскага раёна на ЗСК-100 высушылі 11 361 т збожжа. Дзяніс Шумчэня, Юрый Дуранкаў, Руслан Маркаў, Дзяніс Магераў з ААТ «Агракамбінат «Юбілейны» Аршанскага раёна (КЗСВ-60, 5926 т). Дзмітрый Казіміранка, Дзмітрый Гарэнькаў, Анатоль Булатаў, Анатоль Шабан з ААТ «Маяк Высокае» Аршанскага раёна (КЗСВ-30Г, 5120 т).

«Віцебскія весці»

Сёння Старшыня Палаты прадстаўнікоў Нацыянальнага сходу Рэспублікі Беларусь і ўпаўнаважаны прадстаўнік Кіраўніка дзяржавы ў Віцебскай вобласці знаходзіцца з працоўнай паездкай на паўднёва-ўсходзе Віцебскай вобласці. У прыярытэце — ход і тэмпы ўборачнай кампаніі ў рэгіёне. Старт маніторынгу далі на палях гаспадаркі ААТ «Якубова-Агра». Гэта перадавое сельгаспрадпрыемства ўпэўнена трымаецца ў лідарах Дубровенскага раёна, дэманструючы стабільны рост і высокія паказчыкі. Ім кіруе Наталля Шэндрык — унікальны для рэгіёна дырэктар: яна адзіная жанчына, якая ўзначальвае мясцовае прадпрыемства ў сферы АПК.

– Ваш авёс мяне па-добраму здзівіў, – такую станоўчую ацэнку даў Ігар Сяргечанка полю, на якім ідзе ўборка.

"Віцебскія весці"

Традыцыйны пешы маладзёжны Адыгітрыеўскі хрэсны ход стартаваў сёння ў Віцебску. Ужо на працягу 22 гадоў паломнікі штогод у жніўні пераадольваюць 120-кіламетровы шлях, каб прыняць удзел ва ўрачыстасцях у гонар цудатворнага абраза Божай Маці «Адыгітрыя» ў Свята-Успенскім кафедральным саборы Смаленска.

Адну са сваіх старажытных святынь праваслаўная царква ўшаноўвае 10 жніўня. Паводле падання, абраз Божай Маці быў напісаны святым евангелістам Лукой падчас зямнога жыцця Прасвятой Багародзіцы. Згодна з адным са сказанняў, грэчаскі імператар Канстанцін IX Манамах у 1046 годзе дабраславіў ім сваю дачку Ганну, выдаючы замуж за чарнігаўскага князя Усевалада, сына Яраслава Мудрага. Паколькі гэты абраз суправаджаў царэўну Ганну падчас падарожжа з Царграда ў Чарнігаў, ён атрымаў назву «Адыгітрыя» («Правадырка»).

Пасля смерці князя Усевалада Яраславіча і яго жонкі Ганны абраз перайшоў да іх сына Уладзіміра Манамаха, які перанёс сямейную рэліквію з Чарнігава ў Смаленск і паставіў яе ў саборным храме ў гонар Успення Багародзіцы. З гэтага часу абраз Прасвятой Багародзіцы «Адыгітрыя» пачалі называць «Смаленскім». Лічыцца, што адным з яго цудаў было выратаванне горада ад татараў.

Лёс арыгінальнага абраза невядомы, цяпер на яго месцы ва Успенскім кафедральным саборы знаходзіцца цудатворны спіс, зроблены ў 1602 годзе.

У хрэсны ход праваслаўная моладзь адправілася пасля набажэнства ў Свята-Успенскім кафедральным саборы. Першы прыпынак — каля помніка Аляксандру Неўскаму, затым запланавана наведванне Свята-Пакроўскага храма, цэркваў святой мучаніцы Таццяны і свяціцеля Васіля Вялікага. Па маршруце на прыпынках запланаваны канцэрты з удзелам творчай групы Віцебскай епархіі.

У суботу, 6 жніўня, у Лёзне ўдзельнікі хрэснага ходу прымуць удзел у боскай літургіі, а пасля праходжання мяжы да беларускіх паломнікаў далучацца расійскія. У дарозе праваслаўная моладзь старанна моліцца перад абразам Божай Маці аб міры на зямлі і ў сем’ях, аб дапамозе ў падарожжах.

Кульмінацыяй рэлігійнай працэсіі маладзёжных праваслаўных груп стане ўдзел ва ўрачыстасцях у Смаленску на Саборнай гары ва Успенскім кафедральным храме.

"Віцебскія весці"

Пра пенсійныя гарантыі для шматдзетных маці распавялі БЕЛТА ў прэс-службе Міністэрства працы і сацыяльнай абароны.

Шматдзетным маці, якія нарадзілі пяць і больш дзяцей і выхавалі іх да 8-гадовага ўзросту, прадастаўлена права на працоўную пенсію па ўзросце са зніжэннем агульнаўстаноўленага пенсійнага ўзросту на пяць гадоў. Пры гэтым устаноўлены паніжаныя патрабаванні да стажу працы. Патрабуецца пяць гадоў працы з уплатай абавязковых страхавых узносаў (страхавы стаж) і 15 гадоў агульнага стажу (з улікам страхавога).

Незалежна ад узросту пенсія па ўзросце прызначаецца шматдзетным маці, якія нарадзілі пяць і больш дзяцей і выхавалі іх да 16 гадоў, пры стажы працы на сельгаспрадпрыемстве ў вытворчасці сельскагаспадарчай прадукцыі не менш як 10 гадоў (без заліку ў стаж часу догляду за дзецьмі).

Шматдзетным маці, якія нарадзілі чатырох дзяцей і выхавалі іх да 8-гадовага ўзросту, працоўная пенсія па ўзросце прызначаецца па дасягненні імі агульнаўстаноўленага пенсійнага ўзросту пры паніжаным страхавым стажы (5 гадоў) і пры наяўнасці 20 гадоў агульнага стажу (з улікам страхавога).

У агульны стаж разам з перыядамі працы залічваюцца перыяды догляду за дзецьмі ва ўзросце да трох гадоў агульнай працягласцю не больш за 12 гадоў.

У міністэрстве таксама нагадалі асноўныя ўмовы для пенсіі па ўзросце. Для мужчын агульны стаж працы павінен складаць не менш за 25 гадоў, для жанчын — не менш за 20-ці. Пенсійны ўзрост у Беларусі для мужчын — 63 гады, жанчын — 58 гадоў. Страхавы стаж пры гэтым павінен быць не менш за 20 гадоў.

На нарадзе ў Прэзідэнта Беларусі па пытанні стварэння Акадэміі інтэлектуальных тэхналогій была падрабязна выкладзена канцэпцыя ўніверсітэта будучыні, перадае карэспандэнт БЕЛТА.

Як далажыў міністр адукацыі Андрэй Іванец, рэалізацыя эксперыментальных праграм акадэміі ў поўнай меры будзе магчымай толькі пры адборы матываваных і адораных людзей. Спецыялісты лічаць, што пры масавым наборы гэтыя эксперыментальныя праграмы не дадуць належнага эфекту.

«Трэба адкрыць дзверы для выпускнікоў каледжаў, для тых хлопцаў і дзяўчат, якія ўжо сёння вучацца ў ВНУ, праявілі сябе і хочуць перавесціся ў гэты новы адукацыйны цэнтр. У праекце ўказа маецца і такая траекторыя», — падкрэсліў міністр адукацыі. Ён растлумачыў, што студэнтам, якія жадаюць паступіць у цэнтр, неабходна будзе прайсці субяседаванне і здаць унутраны экзамен.

«Пераможцаў міжнародных і рэспубліканскіх алімпіяд мы абавязаны забраць са школьнай лаўкі, каб не дапусціць люфту часу, калі яны могуць вагацца: выбраць айчынную ўстанову адукацыі або паехаць у іншую ВНУ», — канстатаваў Андрэй Іванец.

Міністр адукацыі адзначыў, што ўпор у акадэміі будзе зроблены на атрыманне рэальнага эфекту для эканомікі. Падрыхтоўка будзе ажыццяўляцца ў галіне прыродазнаўчых навук і інжынерных тэхналогій. Спецыялістаў будуць навучаць распрацоўцы перспектыўных і сучасных тэхналогій, якія прадаюцца ў Беларусі і за мяжой.

«Упор будзе зроблены на праектнае навучанне. Базавую адукацыю мы дамо за два першыя курсы. Гэта будзе напружаная і карпатлівая вучоба. З трэцяга курса пачынаецца фактычна індывідуальнае навучанне: канкрэтны праект, канкрэтная тэхналагічная задача і прадпрыемства, для якога спецыяліст або міждысцыплінарная каманда будуць вырашаць задачы», — падкрэсліў Андрэй Іванец.

Адным з важных напрамкаў дзейнасці адукацыйнага цэнтра ён назваў вырашэнне кадравага пытання: «Мы павінны забяспечыць пераемнасць пакаленняў. Па шэрагу напрамкаў у нас ёсць старэнне кадраў — мы гэта бачым і ў ВНУ, і ў Акадэміі навук. Эту тэндэнцыю мы павінны пераламаць, выхаваць новых вучоных, выкладчыкаў, галоўных тэхнолагаў».

Пры рабоце над стварэннем новага адукацыйнага цэнтра вывучаўся досвед вядучых ВНУ Расіі і Кітая. «Мы паглядзелі перспектыўныя напрамкі, як арганізаваны адукацыйны працэс і як туды ўцягнуты не толькі студэнты, але і выкладчыкі, выпускнікі і рэальны сектар эканомікі», — сказаў Андрэй Іванец. Улічвалася і класічная айчынная адукацыя, якая характарызуецца спалучэннем базавых курсаў фундаментальных дысцыплін з лабараторнымі практычнымі заняткамі. У сувязі з гэтым міністр адукацыі падкрэсліў, што на базе Акадэміі інтэлектуальных тэхналогій прадугледжваецца стварыць не толькі класічныя вышэйшыя школы, але і навукова-адукацыйныя лабараторыі.

Прэзідэнт Беларусі Аляксандр Лукашэнка павіншаваў работнікаў і ветэранаў органаў дзяржаўнага кантролю з прафесійным святам. Пра гэта БЕЛТА паведамілі ў прэс-службе беларускага лідара.

Кіраўнік дзяржавы адзначыў, што забеспячэнне эканамічнай бяспекі краіны, маніторынг сацыяльна-эканамічнага развіцця і эфектыўнага выкарыстання дзяржаўных сродкаў, абарона правоў грамадзян з'яўляюцца непарушнымі прыярытэтамі ў дзейнасці Камітэта дзяржаўнага кантролю.

"Ваш штодзённы труд — гэта сапраўднае служэнне Радзіме на прынцыпах найвышэйшай самааддачы, аб'ектыўнасці і законнасці, — падкрэсліў Аляксандр Лукашэнка. — Пастаўленыя перад ведамствам задачы патрабуюць прадуманых і ўзважаных дзеянняў, захавання аптымальнага балансу інтарэсаў дзяржавы і суб'ектаў гаспадарання".

Прэзідэнт упэўнены, што лепшыя традыцыі, закладзеныя ветэранамі, прафесійныя веды і вопыт, укараненне прагрэсіўных тэхналогій, актыўная работа па прафілактыцы эканамічных і карупцыйных злачынстваў і ў далейшым будуць надзейнай гарантыяй вырашэння важных для эканомікі Беларусі пытанняў.

Аляксандр Лукашэнка пажадаў усім моцнага здароўя, дабрабыту і невычарпальнай энергіі для дасягнення новых прафесійных вынікаў.