01.06.2022

Касцюм паненкі і лялькі-абярэгі: у Віцебску адкрылася выстаўка вырабаў народных майстроў Дзісны

У Віцебскім абласным метадычным цэнтры народнай творчасці адкрылася выстаўка майстроў Дзісненскага гарадскога дома рамёстваў. Аб гэтым карэспандэнту БЕЛТА паведамілі ва ўстанове культуры.

Выстаўка стала часткай арт-праекта "Захавальнікі народных рамёстваў". Гледачы змогуць убачыць сярод экспанатаў вырабы, выкананыя ў тэхніцы мастацкай разьбы па дрэве, у тым ліку драўляныя свістулькі і лыжкі. Увазе наведвальнікаў прапанаваны вырабы ў тэхніцы абрэзкавага шыцця, а таксама лялькі спрадвечна дзісненскай зямлі, лялькі-абярэгі, аб'ёмныя вянкі. Сярод абярэжнай атрыбутыкі вылучаюцца абярэгі ў выглядзе конікаў і падкоў. Такія вырабы прадстаўлены і ў якасці сувенірнай прадукцыі.

Дзісненскія майстры шмат працуюць з тканінай. У экспазіцыі таксама прадстаўлены розныя інсталяцыі, вязаныя і тканыя палавічкі, з якіх народныя ўмельцы складаюць цэлыя кампазіцыі.

Асаблівая мадэль на выстаўцы - традыцыйны святочны касцюм дзісненскага краю. Дырэктар АМЦНТ Кацярына Лабука расказала, што гэта першы ў вобласці цэльны рэканструяваны народны касцюм. Майстар Дзісненскага гарадскога дома рамёстваў Алёна Балаш аднавіла яго па адной з энцыклапедый, якія расказваюць пра беларускі народны строй. Гэта была карпатлівая і складаная работа, паколькі ў выданні не было ні падрабязных схем, ні выкраек і даводзілася арыентавацца толькі на прыведзеныя малюнкі. Паводле ацэнкі спецыялістаў, у выніку атрымаўся вельмі блізкі да арыгінала касцюм паненкі. Гэты ўмела выраблены ансамбль дапоўнены тканым уручную поясам.

Жадаючыя азнаёміцца з тэрытарыяльнымі асаблівасцямі народных рамёстваў дзісненскай зямлі могуць наведаць экспазіцыю да 15 чэрвеня.