20.03.2026

Кітайскія інвестары на Віцебшчыне будуць займацца вырошчваннем агародніны і ягад у закрытым грунце

Кітайскія інвестары на Віцебшчыне будуць займацца вырошчваннем агародніны і ягад у закрытым грунце. Прадстаўнікі кампаніі "Шаньдун Лісэнтэ Агратэхналоджы" абмеркавалі дэталі праекта на сустрэчы з кіраўніцтвам аблвыканкама. Кіраўнік рэгіёну Аляксандр Рагожнік падкрэсліў важнасць сумеснай вытворчасці як з пункту гледжання будаўніцтва новага аб'екта, так і з пункту гледжання абмену кампетэнцыямі. Віцебшчына зацікаўлена ва ўкараненні перадавых сусветных тэхналогій, якія даюць магчымасць забяспечыць насельніцтва якаснай і даступнай агароднінай і садавінай круглы год.

Папярэдняя дамоўленасць аб будаўніцтве ў Беларусі комплексу цяпліц была дасягнута пасля сустрэчы Аляксандра Лукашэнкі з кіраўніком кітайскай кампаніі Ванам Шоўба. "Шаньдун Лісэнтэ Агратэхналоджы" ўжо працуе ў Беларусі - будуе цяпліцу 4-га пакалення для вырошчвання таматаў па заказу Светлагорскага цэлюлозна-кардоннага камбіната. Падчас першага візіту ў Віцебскую вобласць кітайскія інвестары наведалі некалькі патэнцыйных пляцовак, выбар быў зроблены на ўчастку ў 25 га паблізу ад асаблівай эканамічнай зоны "Брэміна".

- Мы ўжо стварылі сумеснае прадпрыемства і зараз будзем распрацоўваць бізнес-план для гэтага праекта. У цяпліцы збіраемся вырошчваць памідоры, агуркі, трускаўку. Будзе таксама створана выставачная зона, дзе зможам прэзентаваць тэхналогіі вырошчвання іншых культур. Прадугледжаны ўчастак для выпрабавання прадуктыўнага насення. У першую чаргу прадукцыя будзе рэалізоўвацца мясцоваму насельніцтву, па-другое - пастаўляцца ў Расію і Еўропу, - растлумачыў Ван Шоўба.

Кіраўнік кітайскай кампаніі таксама растлумачыў выбар паўночнага рэгіёна для рэалізацыі маштабнага праекта:

- Сельскай гаспадарцы ў Беларусі надаецца першарадная ўвага. Прыярытэтным напрамкам развіцця Віцебскай вобласці рэгіёну з'яўляецца развіццё аграпрамысловага комплексу. Немалаважна і тое, што ўлады нам аказалі вялікую падтрымку.

Першы намеснік старшыні аблвыканкама Сяргей Ляўковіч падкрэсліў, што будаўніцтва цяплічных комплексаў - адзін з напрамкаў развіцця аграпрамысловага комплексу паўночнага рэгіёну.

- Мы плануем актыўна развіваць вытворчасць не толькі гародніны, але і іншых відаў прадукцыі ў абароненым грунце. Нам цікавыя падыходы да гэтага напрамку кітайскага боку, узаемадзеянне ў плане сумесных інвестыцый у праекты. На дадзеным этапе ідзе абмеркаванне дэталяў праекту, рыхтуецца тэхніка-эканамічнае абгрунтаванне, бізнэс-план, прапрацоўваецца мадэль існавання будучага прадпрыемства. Галоўнае - яго эканамічная эфектыўнасць. У перспектыве збіраемся не абмяжоўвацца Аршанскім раёнам, будзем развіваць цяплічную вытворчасць і ў іншых частках нашай вобласці, - адзначыў Сяргей Ляўковіч.

Па словах першага намесніка старшыні аблвыканкама, будаўніцтва цяплічнага комплексу завершыцца ў бліжэйшыя два - тры гады. Таксама працягнецца рэканструкцыя існуючых цяпліц "Рудакова" і "Вясна-Энерга", каб яны адпавядалі сучасным стандартам, а прадукцыя магла канкурыраваць як на ўнутраным, так і на знешнім рынках.

"Витебские вести"