11.02.2020

У Полацку праходзіць міжнародны літаратурны конкурс «Цэнтр Еўропы»

У Полацку аб'яўлены III Міжнародны адкрыты літаратурны конкурс "Цэнтр Еўропы - 2020", паведаміла карэспандэнту БЕЛТА намеснік дырэктара Полацкай раённай цэнтралізаванай бібліятэчнай сістэмы Ганна Пацалуйкіна-Урублеўская.

Да ўдзелу ў форуме запрашаюцца аўтары з розных краін, якія пішуць на рускай і беларускай мовах. Свае творы яны могуць прадставіць у намінацыях "Паэзія", "Малая проза", "Мастацкі пераклад", "75-годдзе Перамогі ў Вялікай Айчыннай вайне", "Мовай Янкі Купалы і Якуба Коласа".

Першы этап традыцыйна праходзіць дыстанцыйна. Заяўкі на ўдзел і работы аўтары павінны адправіць да 20 красавіка, пасля чаго журы трэба будзе выбраць найбольш дастойныя творы. Іх аўтараў запросяць на другі этап конкурсу. Ён пройдзе ў канцы мая на святкаванні Дня горада. Праграма мерапрыемстваў у гэтыя дні чакаецца насычаная: запланаваны літаратурна-сцэнічны конкурс "Паэт-артыст", творчыя вечары, прэзентацыі, дыскусіі, майстар-класы. Запрошаныя аўтары, акрамя ўдзелу ў цырымоніі ўзнагароджвання конкурсу, змогуць выступіць на адкрытых паэтычных пляцоўках, кніжных выстаўках-продажах і майстар-класах па вершаскладанні.

Конкурс праводзіцца раз у два гады. Апошні раз, у 2018 годзе, свае творы на яго прыслалі 215 удзельнікаў з 12 краін свету, у тым ліку Расіі, Грузіі, Вялікабрытаніі. Арганізатар - Полацкая раённая цэнтралізаваная бібліятэчная сістэма, гарадская літаратурная студыя "Цэнтр Еўропы" пры падтрымцы Полацкага райвыканкама.