28.01.2025

Докшыцкі РАСК стаў лепшым у вобласці па выніках працы ў мінулым годзе

Лепшым падраздзяленнем вобласці па выніках работы мінулага года прызнаны Докшыцкі раённы аддзел Следчага камітэта – нараўне з Наваполацкім гарадскім аддзелам. Пра гэта стала вядома на выніковай аператыўнай нарадзе ў Віцебску пад кіраўніцтвам першага намесніка старшыні Следчага камітэта Беларусі Алега Шандаровіча.

Узнагарода была ўручана начальніку раённага аддзела Тофіку Дзямешку.

Адным з важных паказчыкаў, які вылучае службовую дзейнасць докшыцкіх следчых, з’яўляецца высокая аператыўнасць расследавання крымінальных спраў. Калектыў зладжаны і высокапрафесійны і, дарэчы, па выніках службы за 2023 год таксама знаходзіўся ў лідарах сярод падраздзяленняў вобласці.

Падчас цырымоніі ўзнагароджання ў Віцебску таксама адзначаны намеснік начальніка Докшыцкага РАСК Юрый Лаўрыновіч – за выдатныя вынікі ў прафесійнай дзейнасці ён атрымаў нагрудны знак адрознення “За добрасумленную службу”.

У 2024 годзе ў вытворчасці следчых Віцебскай вобласці знаходзілася амаль 19 тысяч крымінальных спраў. Па матэрыялах праверак і крымінальных справах унесена каля 3400 прадстаўленняў аб устараненні парушэнняў закону, прычын і ўмоў, якія садзейнічалі ўчыненню злачынстваў.

dokshitsy.by