02.09.2020

Новы навучальны год пачаўся ў школах Докшыцкага раёна

Сёння Беларусь адзначае Дзень ведаў. Свята ўсіх вучняў, іх бацькоў і, вядома, настаўнікаў. Доўгачаканы дзень, за якім пачынаецца шлях даўжынёй у яшчэ адзін навучальны год. Для кагосцi першы, для выпускнікоў - апошні, але для кожнага важны, патрэбны, цікавы і карысны.

Як і ва ўсёй краіне, у школах раёна свята ведаў пачалося з ўрачыстай лінейкі. Старшыня райвыканкама Алег Кавалёнак у гэты дзень пабываў у Бярозкаўскай дзіцячы сад-базавай школе. Разам з ім ганаровым госцем урачыстасці стаў Міністр юстыцыі Рэспублікі Беларусь Алег Сліжэўскі. На сённяшні дзень ўстанова адукацыі ў Бярозках невялікая - ўсяго 34 вучня.

- Але яна ёсць, і ў далейшым будуць прыкладзены ўсе намаганні, каб школа існавала як мага даўжэй, каб стабілізавалася становішча мясцовай гаспадаркі. Маленькія школы не трэба спяшацца зачыняць, таму што яны ў некаторай ступені не даюць загаснуць жыццю ў вёсцы, - падкрэсліў у сваім выступе кіраўнік раёна. - Упэўнены, што хлопцы падтрымаюць нашы намаганні добрай вучобай, бо краіне патрэбны адукаваныя спецыялісты, творчыя людзі. Для ўсіх вас сёння знакавы дзень. Хай у вас усё атрымаецца. У добры шлях!

Алег Сліжэўскі, які ўжо каторы год наведвае Бярозкі, назваў школу дружнай сям'ёй, дзе ўсім цяпло і камфортна. Падзякаваў настаўніцкі калектыў за тую цудоўную атмасферу, якая пануе ва ўстанове, куды заўсёды хочацца вяртацца.

- За той час, пакуль наша міністэрства сябруе са школай, мы праводзілі ў дарослае жыццё некалькі пакаленняў выпускнікоў, шчыра віталі першакласнікаў і сёння вельмі рады, што ўстанова існуе, а гэта вельмі важна ў нашай дзяржаве, палітыка якой мае сацыяльную накіраванасць, - адзначыў міністр.

Як заўсёды, ён прывёз з сабой цудоўныя падарункі. Іх атрымаў кожны з чацвярых першакласнікаў, а сама ўстанова - ноўтбук і інтэрактыўную дошку.

Прагучалі прыгожыя словы, пажаданні, і празвінеў званок, што вярнуў вучняў у класы на ўрок, назва якому ў гэтым годзе «Я вырас тут, і край мне гэты дораг».

Тамара Альшэўская.

Фота Аляксандра Варанковіча.

Крыніца: http://www.dokshitsy.by/2020/09/novyj-uchebnyj-god/