12.12.2025

Пра вынікі восеньскай прызыўной кампаніі распавялі ў Докшыцкім райваенкамаце

Завершана прызыўная кампанія восені 2025 года. У верасні – лістападзе бягучага года ўзброеныя сілы папоўнілі больш за 45 нашых землякоў.

Пра вынікі кампаніі распавядае начальнік групы прызыву на вайсковую службу райваенкамата маёр Наталля Бачкова:

- Усе юнакі па плане прайшлі праз мерапрыемствы прызыву. Спецыяльная камісія па кожным прыняла рашэнне: кагосьці заклікала на тэрміновую ваенную службу або на службу ў рэзерве, хтосьці залічаны ў запас па стане здароўя, а камусьці дадзена адтэрміноўка.

Тэрміновая вайсковая служба ў Беларусі – абавязковая: у каго няма вышэйшай адукацыі, служаць 18 месяцаў, хто мае вышэйшую адукацыю – 12 месяцаў, той, хто прайшоў навучанне на вайсковых кафедрах або факультэтах па праграмах падрыхтоўкі малодшых камандзіраў і здаў устаноўленыя праграмамі падрыхтоўкі экзамены, – 6 месяцаў. Ёсць у нас і тыя, хто прызваны на службу ў рэзерве. Гэта грамадзяне, якія скончылі ўстановы вышэйшай адукацыі Рэспублікі Беларусь сельскагаспадарчага профілю і працуюць у арганізацыях аграпрамысловага комплексу, а таксама якія маюць хадайніцтва кіраўнікоў адпаведных арганізацый, настаўнікі ўстаноў агульнай сярэдняй адукацыі.

На жаль, застаецца актуальнай праблема ўхілістаў. Некаторыя юнакі "бегаюць" ад службы па некалькі месяцаў. Напрыклад, адзін з докшыцкіх прызыўнікоў цягам некалькіх гадоў атрымліваў адтэрміноўку. Напярэдадні свайго 27-годдзя, а прызыўны ўзрост у нашай краіне ад 18 да 27 гадоў, ён з'ехаў у Расійскую Федэрацыю, дзе тэрмінова адкрыў бальнічны ліст, які падаўжаў аж да самага дня нараджэння. Ёсць і станоўчыя прыклады. Адзін прызыўнік па аб'ектыўных прычынах атрымліваў адтэрміноўку. Але малады чалавек хацеў пайсці на вайсковую службу. Таму ён зарэгістраваўся ў сваякоў у іншым горадзе, стаў на воінскі ўлік і адправіўся ў вайсковую частку.

Радуе, што пазітыўных прыкладаў больш. Юнакі самасвядома ідуць у войска, разумеючы, што гэта важна і трэба. Калі дазваляе здароўе для службы ў пэўным родзе войскаў, прызыўнік можа папрасіцца ў тое падраздзяленне, якое падабаецца больш. Да такіх пажаданняў мы заўсёды прыслухоўваемся. Да адпраўкі ў войскі прызыўнікам прадастаўляецца магчымасць бясплатна навучыцца ў арганізацыях ДТСААФ па розных ваенна-ўліковых спецыяльнасцях. Самай папулярнай з'яўляецца прафесія кіроўцы. У ходзе ваеннай службы многія атрымліваюць яшчэ адну вадзіцельскую катэгорыю.

Звяртаю ўвагу, што адміністрацыйная адказнасць за няяўку на мерапрыемствы па прызыву прыводзіць да накладання штрафу ў памеры ад 10 да 30 базавых велічынь. А крымінальная адказнасць за ўхіленне ад мерапрыемстваў па прызыву на вайсковую службу цягне пакаранне ў выглядзе грамадскіх работ, або штрафу, або арышту, або абмежавання волі на тэрмін да 2 гадоў, або пазбаўлення волі на тэрмін да 2 гадоў. Абмежаваннем волі на тэрмін да 5 гадоў або пазбаўленнем волі на той жа тэрмін караюцца ўхіленнi ад мерапрыемстваў па прызыву на вайсковую службу, учыненыя шляхам наўмыснага прычынення сабе цялеснага пашкоджання, альбо сімуляцыі захворвання, альбо падробкі дакументаў ці іншага падману.

dokshitsy.by