06.04.2021

У Докшыцкім раёне актыўна вядуцца работы па добраўпарадкаванні

Усталявалася сапраўднае вясновае надвор'е, якое нагадала пра той час, калі трэба актыўна займацца навядзеннем парадку на зямлі. І не толькі на ўласных сядзібах. Могілкі - гэта яшчэ адно месца, дзе павінна быць чыста.

Работы па навядзенні парадку пачаліся ў адпаведнасці з зацверджаным планам мерапрыемстваў. Іх запланавана выканаць у тым ліку і на 37 могілках у райцэнтры і сельскіх населеных пунктах. Выдаленнем старых дрэваў на пахаваннях ў Лапутах і Падомхах займаліся работнікі камгаса, Докшыцкага лясніцтва і хлебазавода, высечкай хмызнякоў на могілках у Літоўцах, Ліпаўках, Малажанях, Верацеях і Новай Вёсцы Крулеўшчынскагасельсавета - адваротнае дэпо, раён электрасетак, ПУ «Віцебскторф» і ўчастак Віцебскай дыстанцыі лесаахоўных насаджэнняў. Агароджу ў Целешах і Струках адрамантавалі камгасаўцы, якім дапамагалі работнікі культуры і Параф'янаўскага сельвыканкама. Кіпела праца і ў іншых месцах.

На тэрыторыі Бягомльскага сельсавета, дзе знаходзіцца найбольшая колькасць пахаванняў - 28, адпаведна і фронт работ належыць выканаць вялікі. З самай раніцы на могілках у Бераснёўцы пачалі працаваць работнікі Бягомльскага ўчастка РУП ЖКГ і сярэдняй школы. Там жа знаходзіўся і старшыня Бягомльскага сельвыканкама Мікалай Трахiнiн.

- Пасля моцнага ветру ўпала старая хвоя, - паведаміў Мікалай Аляксеевіч. - Добра, што яшчэ не пашкодзіла надмагільныя пліты. Прыбраць дрэва не так проста, таму спачатку камунальнікі распілуюць яго, а затым ужо будуць вывозіць. Шмат і іншай працы. Могілках трэба ачысціць ад смецця, ад лістоты, а таксама вывезці непатрэбныя рытуальныя прыналежнасці з пляцоўкі. Плануем да праваслаўнага Вялікадня ўправіцца. Ужо навялі парадак на могілках у вёсках Краснае, Далёкае, Дамашкавічы і Марговiца.

Таццяна ПАДБЯРЭЗКАЯ.
Фота Аляксандра Варанковіча.