ААТ «Докшыцкі райаграсэрвіс» разам з ААТ «Замастачанскае» і ГП «АграСiтцы» уваходзіць у тройку лідэраў па сяўбе.

 

- У гэтым годзе пад яравыя збожжавыя і зернебабовыя адведзена 1890 гектараў, з іх на сённяшні дзень засеяна больш 750, - паведаміў галоўны аграном гаспадаркі Васіль Грыгаровіч.

Паблізу вёскі Каляга механізатар Віктар Суднік на трактары МТЗ-3522 з агрэгатам АКПД-6р сеяў гарох. На загрузніку яму дапамагаў механізатар са стажам Іван Каляга. Глебу для сяўбы рыхтаваў Міхаіл Валковіч. Усе трое - сапраўдныя работнікі, якіх не трэба падганяць. Даведзеныя дзённыя нормы выпрацоўкі заўсёды перавыконваюць, бо з'яўляюцца практычна патомнымi хлебаробамі. Вось і на гэтым полі працуюць толькі другі дзень, а ўжо засеялі 80 гектараў.

Наогул жа за працоўны дзень, які доўжыцца 12 гадзін з двума перапынкамі на абед, хлопцы паспяваюць засеяць у сярэднім па 50 гектараў. Працэс адладжаны так, што ён бесперапынны. Як толькі сканчаюцца насенне, тут жа да загрузніка падыходзіць машына, якая яго і напаўняе. У дзень атрымліваецца тры разы.

- Настрой добры. Зерне падвозяць, абедамі кормяць. Толькі б тэхніка не ламалася, - кажуць механізатары.

А на палях ля вёскі Вораны поўным ходам ідзе сяўба пшаніцы. Адначасова уносіцца арганіка, падкормліваюцца азімыя збожжавыя.

На фота: механізатар Віктар Суднік

Тэкст і фота Пятра РОМЫСЛАВА.