26.11.2025

У Докшыцах пачынаецца долевае будаўніцтва 40-кватэрнага дома

На вуліцы Усходняй у Докшыцах пачынаецца долевае будаўніцтва 40-кватэрнага дома. Ён размесціцца насупраць чатырохпавярхоўкі, недалёка ад лесапаркавай зоны. Усе падрыхтоўчыя работы практычна завершаны: пракладзена новая газавая труба, завезены неабходныя матэрыялы, устаноўлены бытоўкі для будаўнікоў.

- Новы дом будзе панэльны, вышынёй у пяць паверхаў, - паведаміў кіраўнік праекта дзяржаўнага прадпрыемства "Упраўленне капітальнага будаўніцтва Глыбоцкага раёна" Сяргей Бяляўскі. - З адным скразным пад'ездам. Зайсці ў дом і выйсці з яго можна будзе з двух бакоў. Упэўнены, што навасельцы ацэняць і дзве новыя выгоды — ліфт і памяшканне для зарадкі электрычных інвалідных калясак.

Пасля завяршэння будаўніцтва каля шматкватэрнага дома плануецца ўладкаваць аўтамабільную стаянку і пешаходныя дарожкі, а таксама ўсталяваць дзіцячую гульнявую пляцоўку са спартыўнымі трэнажорамі. Усе работы, адказнасць за якія ўзяло на сябе Глыбоцкае ПМК-48, завершацца ў другім паўгоддзі 2026 года.

dokshitsy.by