13.12.2021

Жыхары Докшыц: абнаўленне Канстытуцыі прадыктавана часам

Чакаецца, што ў снежні будзе апублікаваны праект Канстытуцыі Рэспублікі Беларусь са зменамі. А ўжо на люты запланавана правядзенне рэферэндуму па прыняцці абноўленага Закона. Што думаюць на гэты конт докшычане:

Ядвіга Шульгат, старшыня раённага аб'яднання прафсаюзаў:

– Канстытуцыя павінна ўдасканальвацца згодна з патрабаваннямі часу. Вядома, што ў новым Законе ўзмацняецца роля ўрада і парламента, абазначаюцца паўнамоцтвы Усебеларускага народнага сходу. Прэзідэнт, як і сёння, будзе фармаваць урад. Застаецца моцная прэзідэнцкая ўлада, і гэта добра.

На рэферэндуме па ўнясенні змен у Канстытуцыю кожны з нас прыме сур'ёзныя рашэнні, якія паўплываюць на жыццё грамадства ў цэлым. Папярэднія рэферэндумы, якія прайшлі ў краіне, паказалі салідарнасць народа з Прэзідэнтам, бо ўсе прапановы, унесеныя Аляксандрам Рыгоравічам, людзі падтрымалі. Хочацца верыць, што і на гэты раз адбудзецца тое ж самае - нашы дзеянні будуць накіраваны на кансалідацыю. Рэферэндум - гэта, адназначна, крок наперад для развіцця рэспублікі.

Вікторыя Ждановіч, першы сакратар раённага камітэта БРСМ:

– Беларусь – прагрэсіўная дзяржава, якая развіваецца, фармуе ўласныя прыярытэты. Маладое пакаленне павінна будаваць БЕЛАРУСЬ СЁННЯ – краіну, у якой хочацца жыць, працаваць і гадаваць дзяцей.

Свет мяняецца вялікімі тэмпамі, і ў сувязі з гэтым неабходнасць змен у прававым полі рэспублікі відавочна. Усім нам трэба зрабіць свой унёсак ва ўзмацненне дзяржавы на рэферэндуме.

Моладзі важна адчуваць сваё дачыненне да прыняцця важнейшых рашэнняў у краіне. І ў сваіх здзяйсненнях абапірацца на яе галоўны закон, які прызнае, што чалавек, яго правы, свабоды і гарантыі іх рэалізацыі з'яўляюцца самай высокай каштоўнасцю.

Ніна КРУКОВІЧ

https://www.dokshitsy.by/2021/12/obnovlenie-konstitucii/