13.05.2025

Адзіны ўрок, прысвечаны Дню сям'і, пройдзе ў школах Беларусі 15 мая

Ва ўстановах адукацыі Беларусі 15 мая пройдзе адзіны ўрок, прысвечаны Дню сям'і. Такая інфармацыя размешчана на Нацыянальным адукацыйным партале, паведамляе БЕЛТА.

Змест занятку накіраваны на фарміраванне ў вучняў разумення сямейных каштоўнасцей, любові і павагі да родных і блізкіх людзей, разумення важнасці дзяржаўнай палітыкі Беларусі па падтрымцы і ўмацаванні інстытута сям'і, мацярынства, бацькоўства і дзяцінства.

На Нацыянальным адукацыйным партале размешчана прыкладная матрыца ўрока. Дзеці будуць разважаць над тым, для чаго чалавеку сям'я, як яны разумеюць сцверджанне "Шчаслівая сям'я - моцная дзяржава", чаму падтрымка сям'і ў краіне з'яўляецца нацыянальным прыярытэтам, як дзяржава клапоціцца пра дабрабыт сям'і. На ўроку таксама будуць абмяркоўвацца сямейныя традыцыі і каштоўнасці. Педагогам рэкамендавана ўлічваць узроставыя асаблівасці вучняў.

БелТА