26.11.2025

Беларусь пашырае дыпламатычную прысутнасць у Расіі

Беларусь пашырае дыпламатычную прысутнасць у Расіі. Аб гэтым заявіў міністр замежных спраў Беларусі Максім Рыжанкоў 25 лістапада ў Маскве на сумесным пасяджэнні калегій МЗС Беларусі і Расіі, перадае карэспандэнт БЕЛТА.

"Мы ўдзячныя расійскаму боку за пашырэнне дыпламатычнай прысутнасці ў Расіі. У 2023-2025 гадах шэсць аддзяленняў пасольства Беларусі ператвораны ў генеральныя консульствы. Толькі ў бягучым годзе пачалі функцыянаваць генконсульствы ва Уладзівастоку, Калінінградзе, Ніжнім Ноўгарадзе", - сказаў Максім Рыжанкоў.

Ён паведаміў, што да канца бягучага года плануецца адкрыць беларускую дыпустанову ў Варонежы. "Кожная такая загранустанова - гэта, вобразна кажучы, дыпламатыя крокавай даступнасці, якая патрэбна і бізнесу, і простым грамадзянам", - падкрэсліў кіраўнік МЗС.

Ён таксама канстатаваў, што гэты працэс - двухбаковы. "Запланавана адкрыццё аддзяленняў расійскага пасольства ў Віцебску, Гомелі і Магілёве", - паведаміў Максім Рыжанкоў.

"Усе гэтыя намаганні - і дыпламатычныя, і эканамічныя - у канчатковым выніку працуюць на галоўнае - на дабрабыт простых людзей", - дадаў міністр.

БелТА