04.07.2023

БУТБ зарэгістравала першыя адрасныя здзелкі

 На Беларускай універсальнай таварнай біржы зарэгістраваны першыя восем біржавых адрасных здзелак па продажы піламатэрыялаў на экспарт агульным аб'ёмам 20,6 тыс. куб.м. Прадаўцамі былі дзяржаўныя і прыватныя дрэваапрацоўшчыкі, а пакупнікамі - кампаніі з Азербайджана, Кітая і Узбекістана, паведамілі карэспандэнту БЕЛТА ў прэс-службе БУТБ.

 Адрасны механізм рэалізацыі пілапрадукцыі за мяжу дзейнічае на БУТБ з 22 чэрвеня 2023 года. Ён дае магчымасць айчынным прадпрыемствам-экспарцёрам заключаць біржавыя здзелкі непасрэдна з выбранымі імі замежнымі пакупнікамі. Пры гэтым цана продажу тавару не можа быць ніжэйшай за актуальную біржавую каціроўку на гэты тавар, сфарміраваную па выніках біржавых таргоў. Такім чынам, гарантуецца рэалізацыя стратэгічнага для краіны рэсурсу па яго рэальным рыначным кошце.

 "Асноўным плюсам такога механізму для ўдзельнікаў адрасных здзелак з'яўляецца магчымасць выкарыстання біржавых інструментаў страхавання рызык. Да таго ж за кошт выкарыстання біржавой каціроўкі ў якасці цэнавага арыенціру забяспечваецца празрыстасць цэнаўтварэння пры экспартных продажах і прадухіляецца рэалізацыя пілапрадукцыі па штучна заніжаным кошце", - растлумачылі ў прэс-службе біржы.

 Акрамя таго, адзначаецца, што заключыць біржавую адрасную здзелку па экспарце прадукцыі дрэваапрацоўкі мае права любая кампанія пры ўмове, што і яна, і вызначаны ёю замежны пакупнік акрэдытаваны на БУТБ. "Пры акрэдытацыі кожная кампанія праходзіць праверку службы бяспекі біржы. У выніку адсейваюцца ўсе нядобранадзейныя суб'екты гаспадарання. Гэта так званы ўваходны кантроль, дзякуючы якому мінімізуецца рызыка таго, што ўдзельнікі біржавой адраснай здзелкі не выканаюць свае абавязацельствы", - расказалі ў прэс-службе.

 Дадатковыя перыяды таргоў, на якіх могуць быць заключаны адрасныя здзелкі, праходзяць тры разы на тыдзень - па панядзелках, серадах і пятніцах. Такі графік абумоўлены тым, што біржавыя каціроўкі і максімальны аб'ём піламатэрыялаў для рэалізацыі ў рамках адрасных здзелак вызначаюцца ў час асноўных перыядаў таргоў, якія праходзяць па аўторках і чацвяргах. Больш таго, гэта зручна прадпрыемствам-экспарцёрам, паколькі павышаецца аператыўнасць рэгістрацыі адрасных здзелак.