30.03.2022

Макей і Лаўроў дамовіліся нарошчваць процідзеянне санкцыйнаму націску Захаду

Тэлефонная размова міністра замежных спраў Беларусі Уладзіміра Макея з кіраўніком МЗС Расіі Сяргеем Лаўровым адбылася сёння. Інфармацыя аб гэтым размешчана на сайце расійскага знешнепалітычнага ведамства, паведамляе БЕЛТА.

"Бакі абмеркавалі бягучыя пытанні двухбаковага супрацоўніцтва і саюзнага будаўніцтва, а таксама графік маючых адбыцца расійска-беларускіх кантактаў і мерапрыемстваў па лініі АДКБ", - гаворыцца ў паведамленні.

Міністры абмяняліся думкамі па актуальных рэгіянальных праблемах, уключаючы ход спецыяльнай ваеннай аперацыі Расіі ва Украіне і расійска-ўкраінскіх перагавораў. "Было дагаворана нарошчваць цесную каардынацыю ў знешнепалітычнай сферы, у тым ліку сумеснае процідзеянне нелегітымнаму санкцыйнаму націску з боку шэрага заходніх краін", - падкрэслілі ў МЗС РФ.

У беларускім знешнепалітычным ведамстве, у сваю чаргу, паведамілі, што кіраўнікі МЗС абмяняліся думкамі адносна сітуацыі ва Украіне.

"Падчас размовы міністры замежных спраў закранулі таксама пытанні ўзаемадзеяння ў рамках падрыхтоўкі мерапрыемстваў, запланаваных па лініі знешнепалітычных ведамстваў дзвюх краін", - расказалі ў міністэрстве.