03.08.2020

Саўмін скарэкціраваў памер кампенсацый расходаў па зборы адходаў тавараў і ўпакоўкі

Савет Міністраў скарэкціраваў памер кампенсацый юрыдычным асобам і індывідуальным прадпрымальнікам расходаў па зборы адходаў тавараў і ўпакоўкі пры ўмове іх абясшкоджвання або выкарыстання. Адпаведная пастанова ад 29 ліпеня 2020 года нумар 441 афіцыйна апублікавана сёння на Нацыянальным прававым інтэрнэт-партале, паведамляе БЕЛТА.

Да асобнай катэгорыі аднесены кампенсацыі расходаў па зборы адходаў, атрыманых у выніку нарыхтоўкі ў фізічных асоб. Кампенсацыя за адходы паперы і кардону складае Br150 за тону, шкла - Br180, ПЭТ-бутэлек - Br250.

З'явілася таксама катэгорыя адходаў, якія атрыманы ў выніку сартавання камунальных адходаў або сабраны ў месцах часовага захоўвання, прызначаных для самастойнага размяшчэння адходаў спажывання іх вытворцамі. У гэтым выпадку кампенсацыя за тону паперы і кардону складзе Br150, шкла - Br140, ПЭТ-бутэлек - Br150.

Пастанова ўстанаўлівае памеры кампенсацыі за адходы электрычнага і электроннага абсталявання: ад Br625 да Br815 за тону ў залежнасці ад габарытаў. Кампенсацыя за адпрацаванае маторнае і змазачнае масла складае Br100 за тону, зношаныя шыны, пакрышкі і рызінавыя камеры - Br150 за тону, ртутныя лямпы - Br1,1 за штуку, люмінесцэнтныя трубкі і ртутныя тэрмометры - 83 капейкі за штуку,адпрацаваныя элементы сілкавання - Br5,5 тыс. за тону. Памер кампенсацыі расходаў па зборы ўпакоўкі са шкла, прызначанай для шматразовага прымянення, пры ўмове паўторнага выкарыстання складае 2 капейкі за штуку.

Вызначаны таксама памер кампенсацыі вытворцам прадукцыі, якія прымяняюць тыпы ўпакоўкі, што садзейнічаюць дасягненню мэт рэсурсабярэжэння, аховы навакольнага асяроддзя і экалагічнай бяспекі. Ён складае 10 капеек як за адну шкляную бутэльку ад 0,5 л да 1 л для разліву малака, так і за адну шкляную бутэльку ёмістасцю ад 0,33 л да 0,5 л для разліву негазіраванай пітной вады.

Пастанова ўступае ў сілу пасля яе афіцыйнага апублікавання і распаўсюджвае сваё дзеянне на адносіны, якія ўзніклі з 1 ліпеня 2020 года.