26.01.2026

У Беларусі з 1 лютага павышаюцца памеры бюджэту пражытачнага мінімуму

З 1 лютага ў Беларусі павышаюцца памеры бюджэту пражытачнага мінімуму (БПМ). Аб гэтым БЕЛТА паведамілі ў прэс-службе Міністэрства працы і сацыяльнай абароны.

З 1 лютага па 30 красавіка 2026 года ў Беларусі будуць дзейнічаць новыя памеры бюджэту пражытачнага мінімуму ў сярэднім на душу насельніцтва і па асноўных сацыяльна-дэмаграфічных групах.

БПМ у сярэднім на душу насельніцтва ўстаноўлены ў памеры Br496,96. Гэта на 1,2 працэнта вышэй у параўнанні з нарматывам, які дзейнічае з 1 лістапада 2025 года па 31 студзеня 2026 года.

Памер БПМ для працаздольнага насельніцтва складае Br534,91, пенсіянераў - Br360,75, дзяцей да 3 гадоў - Br308,10, дзяцей ад 3 да 6 гадоў - Br414,55, а для дзяцей ад 6 да 18 гадоў - Br489,90.

Гэта першы пераразлік БПМ у 2026 годзе.

БелТА