02.09.2026

Уборачная, сяўба азімых і дзяржзаказ. Лукашэнка заслухаў даклад кіраўніка Мінсельгасхарча

Прэзідэнт Беларусі Аляксандр Лукашэнка заслухаў даклад міністра сельскай гаспадаркі і харчавання Юрыя Горлава. Пра гэта БЕЛТА паведамілі ў прэс-службе беларускага лідара.

Кіраўніку дзяржавы дакладзена аб завяршэнні ўборкі збожжа, сяўбе азімых культур і закладцы прадукцыі новага ўраджаю ў стабілізацыйныя фонды. Кіраўнік Мінсельгасхарча паведаміў, што збожжавыя і зернебабовыя культуры ўбраны з 99,8% плошчаў. Намалочана больш за 9,1 млн т збожжа з улікам рапсу.

• Сяўбу азімых культур у Беларусі плануюць завяршыць да 5 кастрычніка

Пад ураджай наступнага года трэба пасеяць азімыя збожжавыя на плошчы 1,5 млн га, а таксама больш за 450 тыс. га азімага рапсу. Сяўба азімых культур цяпер знаходзіцца ў актыўнай фазе, пастаўлена задача завяршыць яе не пазней за 5 кастрычніка.

Аляксандр Лукашэнка асобна звярнуў увагу на ўборку саломы з палёў, забеспячэнне неабходных тэрмінаў і якасці ўзворвання глебы з захаваннем усіх тэхналогій. Адначасова аграрыі прыступілі да ўборкі агародніны, уключаючы бульбу і цукровыя буракі.

• Ураджайнасць бульбы ў Беларусі перавышае леташні ўзровень

Кіраўнік дзяржавы цікавіўся, як ідзе закладка ўраджаю агародніны ў стабілізацыйныя фонды. Дзяржзаказ неабходна поўнасцю выканаць да 15 лістапада. Міністр запэўніў, што гэта будзе зроблена ў тэрмін.