Геаграфія

Докшыцкі раён размешчаны ў паўднёва-заходняй частцы Віцебскай вобласці. Яго плошча складае 2239 квадратных кіламетраў. Адлегласць паміж крайнімі кропкамі поўначы і поўдня – 55 кіламетраў, усходу і захаду – 75. 46 працэнтаў тэрыторыі займаюць лясы. У раёне бяруць пачатак і цякуць рэкі Бярэзіна, якая ўпадае ў Днепр, Вілія – прыток Нёмана, Поня і Сэрвач.

Ёсць 11 прыродных азёр: Сэрвач, Плаўна, Вольшыца, Межужол, Дамашкоўскае, Станіслаўскае, Чорнае, Маскавіца, Вішнеўскае, Медзазол, Манец.

Бярэзінскі біясферны запаведнік, размешчаны на тэрыторыі раёна, займае 40359 гектараў. Лясныя ўгоддзі займаюць плошчу 120587 гектараў.

Плошча сельгасугоддзяў раёна складае 70,7 тысяч гектараў, у тым ліку: ворная зямля – 40,6 тысячы, лугавыя землі – 29,6 тысяч гектараў. 77 працэнтаў зямель раёна займаюць супясчаные і пясчаныя глебы, 18 працэнтаў – тарфянікі, 4 працэнты – сугліністыя глебы. З карысных выкапняў у раёне ёсць торф, гліна, жвір, сапрапель.